37wk5 健康院產檢

本來聽日先去健康院做檢查
不過因為聽日應該打8號風球冇得檢查
今日3點幾媽咪叫我即刻去健康院
早左一日仲好
又可以聽下Monmon心跳
今日重量係61.8kg
比上次輕左真係奇怪
過去一星期都冇再食朱古力醬同花生醬
真係唔知同呢d食物有冇咁大關係
不過姑娘都叫我剩下2-3星期再努力食多d營養豐富既食物
希望盡量谷肥BB
而家摸肚都係估計Monmon比較細隻

呢幾個星期日日都好多野飲
又飲牛奶又飲康鈣C又飲魚湯
噚日好辛苦先清左雪櫃入面個一大煲紅豆沙
媽咪又話聽日煲腐竹雞蛋糖水俾我
聽到都覺得飽
我話飲埋D魚湯先啦
佢又好似唔like咁話我自己唔分配時間去飲
其實計下時間都知道一日飲唔到咁多野啦
加上次次煲親魚湯同糖水都一大煲要飲足幾日
呢個星期先食左兩次西瓜
今晚晚餐又食冬瓜
就算要清胎毒都唔係食得咁密囉
我知道媽咪煲野俾我都係一篇好心為我好
但咁飲法真係會頂住個胃好辛苦架
點解阿媽唔會體諒下我呢