幫Monmon改名

(2017/3/5 補寫)

Monmon出世之前老公已經諗左個名
但我都係想搵師傅睇睇個名適唔適合Monmon
姑姐介紹左個師傅俾我地
點知師傅話我地一直想用既"安"字唔夾Monmon
最後老公提議既兩個字都冇用到
老公好似有D失望
不過英文名就由老公決定
咁中文名由我決定都唔算唔公平啦
改左名就可以準備去拎出世紙啦

改名個師傅同我地講
Monmon個性好強
叫我地唔好縱容佢
師傅話等到Monmon5歲左右可以再問下佢既命格
而家只要好好照顧佢先唔好咁心急住
攪到不嬲堅持唔去睇相問卜既我有點心思思好想知道呀

物理治療

(2017/3/5 補寫)

Monmon出世第2日有兒科醫生做檢查
當時醫生話Monmon有斜頸症
經轉介排期今日帶Monmon去屯門醫院做物理治療
物理治療師話暫時唔可以講要做幾多次先好返
除左每星期要去做物理治療外
自己係屋企都要幫Monmon按頸
希望條頸仔條根會盡快鬆啦
見到物理治療師好大力咁按同扭頸仔
我真係忍唔住眼濕濕好心痛呀
點解囡囡咁細個剛剛先得幾日人仔就要受呢d苦
好唔開心好擔心囡囡
原來做父母真係唔容易
小朋友有少少事都會好擔心
總之希望Monmon健健康康同開開心心咁成長啦

澳洲來的禮物

(2017/2/15 補寫)

今日收到嘉琪寄黎既包裹
拆禮物真係好開心

嘉琪送左兩個charms俾我話係送俾我做左媽媽既禮物
好靚好鍾意呀

另外Michael媽咪都送左d禮物俾Monmon

12朝

(2017/2/15 補寫)

12朝啦
今日有好多親戚黎睇Monmon呀
一早就有鍚舅父舅母黎
下午就有daddy姑媽同兩個姑姐黎
非常熱鬧
我就冇得休息啦
不過唔緊要啦大家都係好有心黎睇BB

Daddy送俾Monmon既12朝禮物

雖然係12朝但仍然唔敢沖涼洗頭
真係好想好想沖個靚涼同埋洗頭呀
不過仍然可以忍落去
目標係忍1個月
但其實每日已經用左生水洗傷口啦
每日洗完patpat之後就會再用薑水沖下對腳
但傷口唔敢掂到薑水怕會"拿"到
然後條底底又要老公幫我手洗
去完廁所又要用薑水洗手
所以覺得坐月真係好麻煩呀
好想快d用得生水
到時屋企人唔使日日煲薑水俾我
大家都方便嘛

因為冇洗頭而今日又咁多人黎
我全程都要帶住頂帽先敢見人呀
其實又可以順便擋一擋d冷氣

努力上奶

(2017/2/15 補寫)

噚日開始奶量增加到有50ml啦
好開心呀
但仍然要繼續努力
希望快d有多d奶

明叔叔visit

(2017/2/15 補寫)

今日雖然未到12朝
但明叔叔一家人黎左睇Monmon
佢地係第一批親戚黎睇bb
Monmon全程都好乖冇扭計冇喊
真係好抵錫呀

叔叔佢地送左好多小禮物俾Monmon
個麵包超人袋仲係 unique架
Monmon真係幸福啦

返健康院Check黃

(2017/2/15 補寫)

今朝要帶Monmon返健康院check黃
好開心Monmon黃膽度數好理想
之後唔使再去健康院睇黃了
但下星期都要再去多次健康院
咁我就唔使再周圍走可以安心坐月了

Monmon今日磅重有3.18kg
比出世時輕左0.01kg
Monmon收水應該收得差唔多啦
希望佢飲多d奶快d增磅啦

小腳仔

 

(2017/2/11補寫)

 

Monmon出世Day 6

小腳仔細細隻好得意

而家仲甩緊皮呀

 

坐月既日子都幾難捱

一來要小心唔可以吹到

二來冇得沖涼洗頭

希望快d坐完月啦

 

 

健康院檢查&仁安代謝病篩查

(2017/2/11補寫)

今日10點要返健康院檢查
主要係睇下退黃未
好好彩Monmon黃膽度數已經合格了
後日再返黎睇下就可以啦

因為Monmon埋身飲奶奶唔係好夠耐性
健康院姑娘建議買返個電泵泵奶
之前仲諗住自己做full time mom可以日日埋身所以唔買泵住
結果去完健康院就即刻過吉之島買泵
希望快d泵下奶刺激一下幫助上奶
返到屋企即刻洗泵steam一次就泵奶睇下有幾多奶量
呢支就係我第一樽人奶
希望囡囡鍾意飲啦

下午要去仁安醫院做代謝病篩查
呢個檢查要差唔多$1800
不過做左的確會安心好多
報告要等10日左右就會收到

出發去仁安時Monmon係車到poopoo
第一次係車到幫囡囡清潔patpat
真係好論盡呀
去到仁安又poopoo多一次
真係食一餐痾一次喎
我同老公都好驚幫囡囡抺patpat呀
不過有得痾係代表好
我地應該會慢慢習慣架啦

而家行路個傷口都仲好痛
特別今日去買泵時雖然由健康院行去吉之島只係好短路程
但傷口痛得好勁
仲係要慢慢行先得

開始飲奶粉退黃

(2017/2/11補寫)

今日見到Monmon塊面仔有少少黃
為左快d退黃我冇執著只係俾佢飲人奶
我決定俾奶粉Monmon飲
間中會俾Monmon埋身啜下奶奶
總之希望返健康院時黃膽度數唔好咁高啦

不過我希望快d上奶啦
真係好想成功餵到人奶
希望將呢份珍貴既禮物送俾囡囡

帶Monmon返屋企

(2017/1/26 補寫)

之前問過順產48小時就可以出院了
所以一直都好期待
早上等醫生巡房時太攰訓著左
結果醫生走左都唔知
再問返姑娘肯定醫生俾我今日出院
中午老公都有送飯黎
到下午去聽母乳講座
好快就到晚上探病時間
老公黎左等到8點我地攪埋d手續就一齊返屋企了
我負責抱住Monmon老公負責拎走佬袋
返到去就俾Monmon訓落佢自己張床仔
老公幫我執返d行李出黎之後我地都休息了
可以訓返自己張床真係好舒服呀

今日傷口仍然好痛
希望快d唔再痛啦
而家行路要ar下ar下

新身份

(2017/1/26補寫)

今日開始BB就一直係我床邊由我照顧了
Monmon差唔多兩個鐘要飲一次人奶同換片片
所以基本上冇得休息
同埋女女一喊通常我都會即刻睇下咩事費事嘈住隔離床休息
產後房d姐姐會成日入黎問幾點餵奶同有冇尿尿便便
雖然好攰但好開心
因為我終於做左媽咪了

生完第一次小便要係床上去
過左12個鐘後就可以落床了
一落床去左洗手間來回雖然只係好短路程
但去完返到床邊氣喘同頭暈要即刻坐底休息
老公如常咁黎探我同Monmon
仲好叻咁整左飯&煲左薑水同炒米茶拎黎醫院
奶奶下午同一個親戚黎左睇Monmon
媽咪夜晚放工先黎
大家見到Monmon都好開心

今日Monmon早上俾姐姐帶左去見兒科醫生
返黎姑娘話Monmon有斜頸要轉介去做物理治療
下午有姐姐幫Monmon沖涼
另外Monmon打左人生第一支針---卡介苗
見到姑娘好狠咁插支針入Monmon手臂仔
真係有點心痛

老公係屋企都砌好左Monmon張床仔
準備等Monmon返屋企

Monmon出世啦

8/17 (2017/1/26補寫)

入到產房已經聽到隔離有d媽媽係到叫
自己都開始覺得就快頂唔順
我記得上產前講座時有講過按摩止痛
於是即刻要求叫老公黎幫我按摩
最主要其實好想老公係身邊
唔想開到8度先見到老公
我由打電話俾老公直到老公入產房其實都唔知等左幾耐
但我係咁問助產士老公到左未
仲想再借電話打俾老公
不過可能我問「到左未」問得太多次最後冇人答我
醫生黎左就幫我人手穿水
感覺係唔痛只feel到一大灘暖水流出
然後有人幫我吊藥催生
當見到老公後我個心都定左d (當時都唔知幾點了)
之後有助產士黎教老公按摩
我覺得真係有幫忙感覺條腰舒服左
但陣痛越來越密越來越痛
老公睇住部機預告話我知下一輪陣痛要黎令我有心理準備
陣痛個種痛真係唔知點形容
大概係下面有好大舊屎想痾出黎咁
我真係唔知應該忍定係向下谷
後來忍唔到就向下谷但又唔敢好用力
之後助產士話我谷到下面腫左
影響到bb個頭落黎同子宮頸開度數
但我都冇辦法因為痛到我頂唔順啦
當時我一直都話好熱所以除哂d衫係張床到典來典去
一痛時用手捉住床邊借力向下谷
但俾助產士話唔好捉床邊
痛到大概一點老公突然話好急屎
我唔俾老公出去因為想老公一直係身邊
仲鬧老公點解而家先黎急屎呀
拖左唔知幾耐老公忍唔住了
佢出左產房去廁所呢段時間好似過左差唔多一個鐘咁耐
我係咁講佢去左咁耐去左邊
個心係到諗佢係唔係去左食野先返
總之係咁埋怨佢點解咁耐都唔返
後來老公話出左去只係20分鐘左右只係去左廁所
可能我太痛覺得時間過得好慢囉
到左3點幾見到醫生黎左就問下原來只開左3度
但個幾兩個鐘之前助產士明明話開左4度
個一刻好絕望點解痛咁耐會變返3度架，好想喊
之後又有實習醫生黎到好粗魯咁塞隻手入去check
整到超痛整到好唔舒服
過左一段時間醫生見我痛到係咁叫
佢話咁辛苦不如打止痛針
但副作用可能會暈同嘔
我驚暈會冇力生所以唔打了
老公一直係身邊幫我按摩
後來有位助產士都黎左幫我按仲按得好舒服
可能我太攰了加上按摩令我係中間未有陣痛時訓著左
當然訓分幾鐘又痛醒
到左6點幾7點助產士幫我睇已開左差唔多8度見到BB頭髮了
聽到都有點開心同埋係一個鼓勵因為知道就快生得啦
大約7點幾助產士話可以試下生
用左幾下力就生左女女出黎啦
一生完所有痛楚都冇哂
醫護人員將女女放係我肚上俾我睇左一陣就拎開女女去整走身上血跡同污糟野同磅重
我同老公聽到女女第一下喊聲都好開心
原本以為自己見到女女會喊點知我冇喊反而老公眼濕濕
女女清潔完後聽到助產士報時間同體重
之後女女就訓左係我身上做第一次skin to skin同俾bb試下飲人奶
助產士仲幫我地影左第一張家庭照
感覺好warm好開心好amazing
之後醫護人員幫我檢查話冇剪會陰但爆左少少需要聯針
聯針有點痛但女女係身上分散左我注意力
係產房觀察左差唔多一個鐘我就攬住bb一齊俾姐姐就推我去產後房
老公就被人叫左出去
當一出產房就見到媽咪同老公
原來媽咪一放工就黎左屯門醫院等我地
出產房前姑娘話媽咪好擔心仲按鐘問下我情況
去左產後房一開電話daddy都話搵左我同老公全日都打唔通我地電話
原來大家都好心急

係產後房睇完電話就食幾啖媽咪整既飯就休息了
因為冇訓過加上產後太攰所以有點頭暈
為左訓一陣同姑娘講暫時唔餵人奶住
訓左一陣夜晚3點幾再同姑娘講想餵奶俾bb
但姑娘話過左餵奶時間要等下一轉
產後房姑娘明顯比產前房惡好多

Monmon平平安安咁出世真係好多謝所有醫護人員特別係幫我按摩個位助產士
同埋要多謝老公一直係我身邊支持我同俾我發脾氣
如果冇老公係身邊我都唔知點捱呢8個幾鐘
今日開始我同老公身份都唔同左了
好多謝Monmon黎到我身邊
多謝女女選擇我做媽咪
我以後一定會錫哂女女
PAPA & MAMA LOVE U

住院第三日

8/16 (2017/1/26補寫)

凌晨3點幾開始已經有陣痛
痛下醒下又訓下
早上見醫生後醫生叫我考慮即日催生
但我唔想催生而且係農曆七月十四
由一開始知道預產期時已經希望bb 唔好係呢一日出世
醫生叫我同老公商量一下
但我未有即刻打俾老公反而打俾媽咪傾
因為覺得老公俾唔到意見
我真係好擔心催生會更痛同埋唔鍾意呢一日
同媽咪傾電話時忍唔住喊
媽咪話最緊要聽醫生講
醫生建議催生一定係為我同bb好
而且七月十四又唔係咩咁差
叫我放心唔好諗咁多
到老公下午送飯黎醫院我地商量過就決定同姑娘講接受催生
不過原來要早上講先安排到
而家只可以安排第二日見完醫生先再催生了

到左下午我開始感到陣痛密左同維持時間耐左
我想度數開快d所以係病房行來行去
痛既時候真係行唔到要企定搵野扶住先可以捱過
到夜晚開始覺得好痛
媽咪同老公黎探我
到佢地差不多要走時我忍唔住喊
真係好想佢地留低陪我
到左8/17凌晨開始真係忍受唔到了
全晚按左兩次鐘叫姑娘幫我睇下有冇開度數
點知只係幫我駁機睇宮縮情況
到左大約7點幾我覺得下面好似穿左水咁好多水漏出黎
叫姑娘睇原來全部都係血
姑娘話叫醫生黎睇下我因為流好多血
當時我有d驚
對腳仲控制唔到不斷震震得好誇張
8點左右醫生黎左見到我係咁震都叫我唔使咁驚
但我其實控制唔到自己
醫生睇完話我見紅好多血朝早10點幾可以入產房落藥催生了
聽完有d開心因為bb終於要出黎啦
同埋痛左成晚已經好辛苦
入左產房就可以聞笑氣止痛啦
當時已經痛到想喊
即刻打俾媽咪同老公講就快入產房啦
叫老公準備黎醫院 (其實已經痛到講唔到野咁)
到左10點幾終於有姐姐黎推我入產房了（我已經忘記左自己點樣過床啦！）
其實陣痛由半夜開始好有規律
非常頻密差唔多5分鐘痛一次
一痛就用app記錄低所以差唔多成晚冇訓過
我當時個樣又痛又攰
姑娘見到叫我要加油
其實屯門醫院產前病房姑娘真係好好

見紅入院第二日

8/15 (2016/12/10補寫)

入院第二日
我情況係一直只係見紅
半夜4點幾有陣痛但冇穿洋水
成個夜晚好折磨
全晚聽住d人叫痛
攪到個心都好驚完全訓唔到
以為開始陣痛就快可以生
見完醫生後要留院觀察
如果到第三日都未有規律陣痛或穿水咁就要考慮催生了
聽完醫生咁講令我有點擔心
我好驚催生既陣痛會更加痛
到左下午唔知點解陣痛變得少左
差唔多成個鐘都冇痛一次
個心有d灰
唔知仲要等幾耐先可以生得呢

見紅入院

8/14 (2016/12/10補寫)

差不多6am訓訓下起身去廁所
入到廁所坐低望下條底底見到有少少血
成個人即刻醒哂但冇覺得驚或者緊張
只係諗bb係咪會係今晚出世呢
去完廁所即刻入房話俾老公同媽咪知見紅啦
老公成個彈起身話即刻入醫院啦
但平時上網見人話見紅可以慢慢黎
所以我話想食埋個早餐同沖埋涼先
就係咁，我就同老公落屋企樓下食個早餐醫飽個肚先
我仲以為自己當日會生
同老公講要食飽d如果唔係怕冇力生
返到屋企沖埋個涼就拎走佬袋去醫院啦
去到醫院直上產前病房同姑娘講見紅
老公幫我辦入院手續
姑娘就幫我做下檢查睇下開左幾多度
當時除左見到底底有少少血之外就冇其他作動跡象
我就被安排入院等見醫生
當時係朝早10點幾
老公辦完手續就走左啦
我就仍然覺得好輕鬆咁係床到睇下手機等醫生
好快醫生就黎左
佢話我今日要留院觀察
我都預左啦
就係咁係醫院輕鬆地過左住院既第一日！

手指關節痛

呢一兩個月每朝起身時手指關節都好痛
一訓醒D手指基本上唔可以彎埋
即係唔可以揸拳頭
希望生左之後唔會再有呢個問題啦

今日用左奶奶俾既蒲桃乾煲水
上網睇蒲桃乾水可以清胎毒
我今次加埋雞蛋落去煲埋媽咪個份一齊飲
原來味道甜甜地都幾好味
或者過多幾日再飲多次先

39wk

最近兩三日對腳又再開始腫
著鞋時實在有點困難
噚晚飲左一碗紅豆水同long高對腳訓覺
今朝起身對腳好似消左少少腫
今次算係第二次腫嗎
好緊張呀

呢幾日輪到左邊肋骨痛
唔知係唔係Monmon隻腳仔頂住呢
今日係39wk啦
胎動次數都好多
最鍾意見到Monmon係個肚到wave
不過成日一拎起部電話時就唔wave所以成日都錄唔到
可能Monmon知道我錄影所以比較怕醜

38wk6 健康院產檢

今日檢查磅重63.8kg
同上星期去健康院磅重左2kg
早餐已經介左朱古力同花生醬兩個星期了
但係點解呢一個禮拜會重左咁多
好彩唔使見醫生
姑娘話到生之前keep住食少d甜野同食多d有營養既野就可以
不過下午同老公去食左個超熱氣同冇營養既下午茶
食埋今次炸雞脾應該都要等2個月先可以再食了

房間大掃除

為左放Monmon張床仔入房
噚日同老公執左間房差唔多5個鐘
首先執左放PS3個層架
拎左D公仔出黎洗既洗掉既掉
又拆埋窗簾布落黎洗
再清埋書枱同書架上既雜物
仲有洗左冷氣機
最後換埋我地張床單
老公勞動完已經攰爆
雖然我做既唔多不過都頂唔順夜晚一訓落床就好快訓著了
執完間房感覺好似剛剛搬入黎咁舒服
因為少左好多雜物書架又執到好整齊
囡囡就快出世希望老公D野可以變得有條理D
唔好成日攪到間房亂七八糟啦

倒數10天

倒數中
仲有10日就係預產期8/17啦
好緊張

上次因為老公要返工星期五冇一齊去睇Monmon
老公話怕Monmon嬲所以買左個背嚢仔送俾囡囡
而我就去左馬莎買左好多野食做補償
咁我同Monmon就原諒左老公啦
但Monmon個背嚢仔要等佢大個少少先可以用
而家包好左等第日俾Monmon自己拆開
希望Monmon鍾意爸爸送俾佢既禮物啦

我愛的茶走&豬扒包

今日老公放假等老公整完車就去左洪水橋食下午茶
杯茶走同豬扒包真係好好味呀
自從有左Monmon後就好鍾意食麵包
而家每日都離不開食麵包

38wk2 私家產檢

激死人啦
今日下午約左老公3點係尖沙咀食野之後再去做檢查
點知一早收到老公電話原來俾同事調左更下午一定要返工
攪到得返我一個人去見Monmon
夜晚本來打算出街食飯行街都要取消了
一直以黎每次老公都會一齊去睇Monmon
今次可能係最後一次做私家產檢啦
老公唔可以一齊去真係有點可惜
唯有我錄左段超聲波俾老公睇啦

今日磅重有62.6kg
Monmon重2936g (6lb8oz)
其他野都一切正常
而頭仔都係只落左少少
咁可能Monmon都仲未ready出世
醫生話自己玩下fit ball 都可以幫助到頭仔落去
睇返重量同大細估計出最新既EDD係8/25
唔知Monmon會唔會由獅子座變左處女座呢

媽咪夜晚煮左栗子炆雞俾我食
因為坐月要食得清所以今次食完又要再等一排先有得食啦

老公突如其來的假期

好開心今日老公放假
一早屋企冇食水我地9點前煮左早餐食完再訓
到下午老公陪我去食譚仔三哥米線
到左懷孕後期我終於可以食返至愛既雞肉腐皮啦
但至愛既麻辣十小辣都係唔敢食

今日又飲左腐竹雞蛋糖水清胎毒
到左39wk要飲下綠豆沙先

38wk

之前一直都好希望Monmon係農曆7月之前出世
但今日係農曆7月初一了
剛剛好係38wk
不過Monmon未有動靜
而家每日都會話俾Monmon知係幾多號
希望佢8月頭又或者等到8月18號之後出世啦
而家每日都覺得好熱個肚又成日好硬有時都覺得好辛苦
有點期待Monmon既出世

37wk5 健康院產檢

本來聽日先去健康院做檢查
不過因為聽日應該打8號風球冇得檢查
今日3點幾媽咪叫我即刻去健康院
早左一日仲好
又可以聽下Monmon心跳
今日重量係61.8kg
比上次輕左真係奇怪
過去一星期都冇再食朱古力醬同花生醬
真係唔知同呢d食物有冇咁大關係
不過姑娘都叫我剩下2-3星期再努力食多d營養豐富既食物
希望盡量谷肥BB
而家摸肚都係估計Monmon比較細隻

呢幾個星期日日都好多野飲
又飲牛奶又飲康鈣C又飲魚湯
噚日好辛苦先清左雪櫃入面個一大煲紅豆沙
媽咪又話聽日煲腐竹雞蛋糖水俾我
聽到都覺得飽
我話飲埋D魚湯先啦
佢又好似唔like咁話我自己唔分配時間去飲
其實計下時間都知道一日飲唔到咁多野啦
加上次次煲親魚湯同糖水都一大煲要飲足幾日
呢個星期先食左兩次西瓜
今晚晚餐又食冬瓜
就算要清胎毒都唔係食得咁密囉
我知道媽咪煲野俾我都係一篇好心為我好
但咁飲法真係會頂住個胃好辛苦架
點解阿媽唔會體諒下我呢