老公抺床仔

Monmon張床仔已經送左黎好耐
拆開左之後放埋一邊吹下d木
今日叫左老公抺下
到Monmon返黎就可以有張乾淨又舒服既床仔訓覺啦
見到老公好認真咁清潔
我忍唔住要影低
將來可以俾Monmon睇下爸爸對佢既愛

Monmon&我的日本戰利品

今朝收到Koki寄黎既一箱野啦
雖然知道入面有乜
但開箱個時真係好期待
我覺得女人買完野睇返d戰利品永遠都會好開心

仲有多謝Koki送俾Monmon既衫仔同埋幫我買咁多野
又幫我拎去郵局寄
我諗如果7月去日本shopping真係會失控
希望快d有呢個機會啦





37wk2 肚圍

 

到左37wk Monmon已足月了

好開心Monmon乖乖冇早產

而家肋骨好似冇之前咁痛

只要坐姿正確就可以坐耐少少

37wk2 肚圍都唔算好勁

希望唔好有妊娠紋出現啦

而家覺得行得耐個肚容易硬

不過唔覺得個肚好重好墜

只係對腳好累

行一個鐘左右就一定要休息下了

 

 

 

 

拍拖13.5週年日

今日係同老公拍拖13.5週年日
等老公放工返黎就出去食個下午茶同行街街
雖然冇慶祝但都覺得好開心

今日起身對腳已經消左腫
媽咪噚日整左紅豆沙俾我
食左一次腳腫情況已經少左好多
今晚再食多一次希望聽日起身都唔會腫啦
呢兩日訓覺都將對腳再long高d
聽講都可以減少腳腫既問題

呢個星期每晚食完飯都去散步
每次大概會行30-45mins
有d人話生之前要喪行
我都知45mins唔算好耐
但天氣咁熱仲要有個暖水袋係個肚到
其實真係好辛苦呀
媽咪仲成日話我行得少
其實我都真係好無奈...

36wk6 健康院產檢

今日到左36wk6
一早去左健康院做產檢
磅重係62.7kg
比兩個星期前重左2.3kg
7/21去楊醫生到磅係61.9kg (5日就重左0.8kg)
姑娘以為我磅得唔準要再磅多次
點知反而仲重左0.1kg變成62.8kg
見左姑娘話怕我有妊娠糖尿
因為懷孕後期suppose每星期重0.5kg
我足足重多左一倍呀
攪到下星期又要返去磅重check住
如果一個星期重多過1kg就要見醫生了
我諗係因為平時早餐差唔多每日都食花生醬同朱古力醬
姑娘都話可能因為呢d野太高熱量
再食就只會肥哂係我自己下身到
BB又吸收唔到呢d野
所以聽日開始就唔可以再食呢d做早餐了
不過由一開始51.8kg直到而家62.8kg
暫時黎講體重都冇超標
希望第時減肥唔使太辛苦啦

今日俾姑娘摸肚
佢話BB唔算好大隻
胎水都只係剛剛好
頭仔又未落骨盆
同私家醫生講既野有少少出入
總之最緊要係Monmon健健康康啦

腐竹雞蛋糖水

開始要食下腐竹雞蛋糖水
以前一直唔鍾意食中式糖水
不過原來腐竹雞蛋糖水都幾好味喎
連續食左2日
希望Monmon皮膚白白滑滑啦

老公給我的禮物

老公加人工啦
我收到個靚靚手袋做禮物
超開心
多謝老公

屯門醫院分娩過程講座

今日老公要返工
所以叫左媽咪陪我去屯門醫院聽分娩過程講座
內容都同之前睇書所講既差唔多
不過講座可以睇埋產房係點既樣
原來一間產房可以同時安排兩個產婦入去待產
雖然中間有板隔開左大家睇唔到大家
但如果隔離大叫都會聽得一清二楚
咁樣好似會攪到更加緊張
不過政府資源有限真係冇得講咩私隱

今日對腳突然腫得好緊要
腫到差唔多著唔落對鞋
連腳眼都差唔多見唔到了
自己都估唔到原來會腫到咁既樣
人地話三腫三消就生得
不過我都唔知今次算唔算係第一次腫
之前都好似有少少腫不過冇咁嚴重

36wk1 私家產檢

感冒越來越嚴重
而家要每日飲一杯康鈣C增強返抵抗力

今日係36wk1啦
又到左好期待既私家產檢日
Monmon而家重2553g (5lb10oz)
醫生話BB係中碼BB
上次健康院醫生就話係細碼BB
楊醫生解釋因為政府只係用手摸肚
加上政府醫生見到我個肚唔算好大所以話BB係細碼
另外頭圍同大腿骨都係屬於35wk多D
係正常範圍內
至於肚圍就有36wk3
醫生話肚圍大左即係BB有DD肉地
聽到我都好開心
醫生話如果BB足40wk出世到時可能會有3.5kg
我都希望BB有6.5磅左右唔好太瘦又唔好太肥啦
而Monmon個頭仔已經有少少落左盆啦
因為我好擔心早產所以問醫生有冇咁既可能
醫生話即使真係早左出世都唔怕
因為BB已經有5磅幾
另外楊醫生知道我感冒
開左3日收鼻水既藥仲唔收我藥錢
食左一次已經少左好多鼻水了
而且婦產科醫生開既藥我更加放心
希望可以快D好返啦

Underarm個到有粒野
楊醫生話係正常既
懷孕期間可能係乳線問題
唔使擔心太多等生完BB之後粒野可能會自己冇左
咁我都放心D

楊醫生D姑娘今日俾左2罐能恩奶粉同埋好多水奶我試
好彩一直都未買後備奶粉
而家可以慳返

做完檢查同老公去誠品消磨時間等肚餓
老公買左我最愛既珍珠奶茶俾我飲
行到7點左右去左荔枝角食台灣野
呢一日真係過得好開心呀

蛋白質好豐富的早餐

上網睇到食多D蛋白質會好長胎
之前去一田又買到特價$99兩塊西冷牛扒
於是整個有豐富蛋白質既早餐俾自己同BB
希望聽日去做產檢可以見到BB重多D啦

健康院B鏈檢查

到左35wk今日去健康院做B鏈檢查
過程好快又冇乜感覺
之前上網睇有D人話好痛
不過我覺得完全唔痛只係feel到支綿花棒係下面撩左一下咁就完成左
結果係下星期返去做產檢時就會知道
希望唔好中B鏈啦

今朝起身發覺喉嚨開始唔係好舒服
到左夜晚6點幾仲越來越痛
因為就快生BB真係唔想病
於是拿拿聲去睇醫生
點知醫生話而家懷孕後期唔可以開D好重既藥俾我
到左夜晚已經開始鼻塞了
我最唔開心係最後守唔住個尾門要BB陪我一齊食藥

踏入最後一個月訓覺情況

到左最後一個月訓得越來越差
平訓得耐就腰痛
打側左右訓BB就唔鐘意會狂踢
而且訓醒又腰骨對落痛
今日右大腿仲成日有少少腳痺
而家唔知點解會好驚早產
仲有一星期多D先夠37wk
Monmon一定要乖唔好提早出世呀
留係媽咪個肚到玩多幾個星期先啦
要聽話呀

倒數30日

最後30日啦
好珍惜每次胎動感覺
第日BB出左世就感受唔到
好唔捨得

麥提莎醬

老公買俾我搽麵包既麥提莎醬
即刻買返袋方包黎試下
唔係好甜又有粒粒趣趣好得意

邪惡的早餐

今朝老公陪我去博愛醫院乳線科排期
結果係要排到2017年10月先有得睇
真係誇張

排期後就同老公去食個好邪惡既早餐
又冇營養又熱氣
食完好有罪惡感
不過個杯走冰既凍檸茶真係好正呀

Boots 儲奶袋

今日約左Cherry去VCity飲茶傾計
又聽左好多湊小朋友要留意既野
Cherry剛剛去左泰國玩
佢買左Boots儲奶袋俾我做手信
希望用得著啦
不過唔好既地方原來Boots儲奶袋只可以儲7日冰奶
睇黎如果第日有需要都要搵第二D牌子先得啦

34wk6 健康院產檢

今日8:30要去到健康院做產檢
今日重量係60.4kg
比上星期去楊醫生到磅時重左0.9kg
希望重左係Monmon到而唔係重落我自己到啦
今日聽左姑娘講有咩情況下要入院待產
好似好快就到生個一日啦
今日由醫生做檢查
醫生摸肚話Monmon頭仔未落盤骨
不過呢個週數未落都係正常
另外前日係underarm發現左有一粒大約1cm既粒粒
醫生寫左轉介信去博愛醫院排期
但我已經即刻搵左保險經紀介紹私家醫生
因為排政府真係分分鐘要等一年半載先有得睇
而家就好擔心唔知係咩事
希望快D睇完醫生有結果啦

下午同Ven食下午茶
傾左成2個鐘先返屋企
話題真係講不完

34wk4 腰圍

雙層芝士煎蛋三文治

為左吸收更多鈣質
早餐食左個雙層芝士煎蛋烘底三文治&牛奶

越南牛肉湯河

自己係屋企都煮到越南牛肉湯河
仲可以加料

繼續扮靚靚

今日去做Facial
仲有個半月左右就要生
plan左下星期做埋最後一次
跟住就會等生左Monmon先再去扮靚靚啦

睇中醫

之前一直都打算去睇返中醫把下脈睇下身體狀況係點
到左而家34wk終於睇左啦
醫師話唔係又煙又酒唔使清胎毒
但而家可以開始食西瓜同飲下綠豆沙
醫師又話我而家身體唔算好差
執左兩包藥就夠了
醫師話冇咩特別事就等生左先再返去睇
到時會幫我調理身體同處理腰痛等問題
我諗自己介下熱氣野同食下普遍大肚婆臨生之前食既野都應該OK啦

拍拖食飯

二人世界既時間真係就快完結啦
而且生左BB之後應該有一段長時間唔可以去街
噚日襯住做產檢順便係尖沙咀行街食飯
我地揀左BLT Burger
呢間餐廳我地未結婚時去過一次
我地最鍾意杯milkshake叫做Monkey Business
但而家因為大肚所以唔敢飲
希望生左BB後老公會帶我去飲返一次啦
老公仲陪我"筆"左一杯糖
雖然行街只係行左一兩個鐘
但真係覺得好開心
希望第日仍然有二人世界既機會啦

33wk5 私家產檢

終於都到左去私家醫生到做產檢既日子啦
我最想知道Monmon而家有幾重
同埋我覺得呢一兩星期胎動好似細力左同冇之前咁密
加上最近又成日覺得頭暈眼花
呢D問題都一早記好哂打算問下楊醫生

今日照超聲波Monmon有4lb3oz
胎水適中頭圍肚圍大腿骨都係正常生長範圍
醫生話胎盤功能同臍帶都一切正常
至於胎動醫生睇左一輪見到Monmon都keep住郁下手仔腳仔
應該係Monmon踢得太細力我冇留意到
醫生教左我點數胎動次數等我返屋企可以自己計下
另外頭暈眼花既問題係懷孕期都係正常會出現既情況
所以都冇特別針對呢個問題去處理
而Monmon既重量醫生話正常
但我自己上網睇就覺得Monmon好似輕左1wk
我決定聽日開始要追磅
除左平時食既野之外仲要加多一隻蛋白
希望用呢6星期幫Monmon追返重D啦

奶奶湊B謬誤

今日一早同奶奶&大伯一家飲茶
奶奶今日話多D幫BB沖涼BB會大得快D
老公同我聽完都O哂咀
我只係知道BB皮膚都要有油脂保護
如果沖涼沖得多BB皮膚就會好乾
會容易變得好敏感同埋可能會有濕疹個D皮膚問題
老人家可能好有湊B經驗
但呢D唔係咁科學既說法我都係聽完就算了

下午同老公去左Gap睇BB衫
我地好似快閃黨咁好快就揀左5件衫仔1對襪仔
埋單真係好平HK$300都唔使
原來Gap特價時真係好抵買架
不過同老公一齊行佢就冇乜耐性慢慢揀
今次係第一次同老公一齊揀衫仔俾Monmon
(上次澳洲網購唔算啦因為個次主要係我揀完再問老公買唔買)

刨薑皮

今日當然唔係去參加遊行啦
而係同媽咪老公一齊去街市買薑準備整薑醋
我地一共買左17斤薑
返到屋企3個人一齊刨薑皮好快就刨好哂啦
老公話每刨一下係代表對Monmon既祝福