32wk6 健康院產檢

今日去健康院做產檢
姑娘話比第一次產檢時重左8kg
體重控制得好好
不過可以再重多D因為未有BB之前既BMI過輕
好想快D去私家醫生到照超聲波睇下BB而家有幾重呀
下次返健康院檢查變成2星期後
到時由醫生做檢查
最後7wk啦
Monmon你要繼續健康咁成長呀

今日姑娘建議食下黑芝麻
因為鈣質好多
以後食飯同食麵都會加一湯匙
希望Monmon可以好好吸收啦

哺乳班

今個星期開始落雨
所以d衫仔唔洗住要留返出太陽先再洗啦
咁就可以訓晏少少唔使8點起身

今日下午去左健康院上哺乳班
學左正確既餵母乳姿態同埋餵母乳既好處
如果可以堅持到我都希望可以根據世衛建議餵到2歲或以上
希望我屋企人可以支持我啦
最唔想聽到一d唔支持既說話
例如話人奶到左某階段會冇營養呀
餵人奶攪到BB好癡身呀
係咪唔夠奶俾BB食所以成日喊呀...等等
總之我會盡我能力俾BB最好同最珍貴既人奶作為禮物

Baby in car

終於都買左呢個啦
估唔到最後係買Mickey
因為唔係我揀架囉

護協Shopping

今日老公要返工
我就同EVA食生日飯
可能天氣真係太熱
上左小巴後開始標冷汗, 頭暈想嘔同埋睇野唔清楚
又冇帶糖同話梅唯有即刻合埋眼休息一下
好彩最後都冇事
如果真係有咩事老公話要禁止我出門直到生左Monmon呀

同Eva食飯順便等到老公都放工
我地今日約左去護協買BB用品同去Kowloon City買椰子油
原來護協收4pm好彩我地3點半去到
否則就要白行一次啦
如果去開附近又有車的話上去護協買野都OK抵
否則應該唔會特登去買啦
始終吉之島有時特價有D野會比護協賣得更平
以下呢D除左Pigeon乳墊外
其他都係我地今日係護協買既野
買下買下今日又用左差唔多HK$500啦
D錢用得快到好似倒水咁
老公加油俾心機搵錢呀

聽講呢款日本版Pigeon乳墊比香港版舒服
HK$110有126枚比香港版更要平少少
係Kowloon City的BB用品店見到有得賣於是入定貨試下先

韓燒定食

噚日同老公講有少少肚痛
佢竟然請左今日假陪我
好彩噚日痛左一陣就冇其他問題
所以今日襯老公放假就出去食LUNCH同行下街
忍左8個月有多
今日決定去食韓燒定食
真係好好味呀
不過熱氣野開始唔敢成日食啦
之前已經冇乜介食熱氣野同辣野
始終擔心會影響到Monmon

懷孕32wk

今日係懷孕8個月即32wk了
已經開始進入倒數階段
我而家成日都好驚
又覺得自己過去8個月都過住一D好冇意義同好懶既生活
同時又諗自己得返8wk既自由時間同二人世界
覺得好期待但又有D擔心同唔開心
心情好矛盾
覺得自己諗好多野好似有產前恐懼咁

平時好少去圖書館借書既我
今日做完facial後走左去睇下有咩書借
今次借左3本關於分娩同坐月既書
希望用剩下唔夠2個月既孕期認真咁去睇下書做下準備

晚飯後散步

已經生左兩個囡囡既Didi提我
如果打算自然分娩咁係30wk後就要勁行
今晚老公陪我行左40分鐘大約2.8km
太陽落左山都行到成身汗
希望行多D到時易生D啦

準備洗BB衫

離預產期仲有大約2個月
今日搵哂0-6個月既BB衫出黎準備洗了
因為唔知Monmon會唔會早出世
加上唔係日日咁好陽光
所以早少少開始洗衫會比較好
媽咪幫我買左Amway bb洗衣粉
而我今日就清洗左部洗衣機兩次
等聽朝就可以開始洗衫仔啦
今日先發覺原來有一半以上既衫仔都唔係自己買架
Monmon真係幸福有咁多人送衫衫俾佢著
呢到影出黎既係0-6個月既新衫同包被
全部都好靚我好鍾意

Highchair

老公同事個BB唔肯坐Highchair
所以轉送左張Highchair俾我地用
個款同我地之前想係一田買個架一樣
而家可以將呢HK$2000買第二樣野俾BB啦
不過張椅套非常dirty
將highchair又好多塵我地噚日拎左返屋企立即用滴露消毒一次先
剛剛係吉之島又搵到Aprica替換用既椅套只要大約HK$400
如果要訂原裝就要HK$1000左右
其實我覺得而家買左呢個個顏色比原裝既啡色波點更加靚
所以買唔買原裝都冇乜所謂啦

Fitness ball

老公買左個fitness ball俾我係屋企玩
坐左上去真係舒服D
個背脊同肋骨都冇咁痛
不過一個人玩始終都好似有D危險
自己玩個時一定要小心唔好趺親
老公真係好好
我話想要佢就即刻去買俾我
好多謝老公
以後呢個ball就係我做運動既partner啦

31wk

今日係懷孕既31wk啦
今日下午自己一個人去左散步
一星期內第二次了
如果要等老公陪先去既話咁真係好少機會了
因為而家成日落雨
有時就太曬
有時老公放A返到屋企又去左訓覺
我真係好想行多D希望容易生D
所以會盡量抽多D時間自己去做運動
唔可以俾自己偷懶
我發覺D手指同埋隻腳都腫左同大左啦
希望生完一切都會變返以前咁slim啦

今日散步完成身都出哂汗
好似以前去跑步咁多汗
佗住BB有兩個人真係覺得熱好多

我最鍾意行既青山灣海濱長廊
望出去會見到飛機
又有好舒服既海風

產前運動班

今日一早就起身食早餐準9:30AM去屯門醫院上產前運動班
我終於都享用到公務員家屬既福利
呢個$100既產前運動班我可以免費上堂
大概上左1個鐘左右就上完啦
內容都好實用
首先都係聽下物理治療師講解下有咩運動係適合孕婦去做
然後就會一邊教一邊做運動
一班好似有12人一齊上係小班教學
所以物理治療師會睇到我地做既動作有冇唔正確
而今次都有教上次學左既呼吸法
我諗都要多加練習下先得
另外學左既運動好似真係令個人舒服一D
所以係屋企有時間一定要做多D
而家仲有大約兩個月BB就要出世
希望做多D運動令產程可以更順利啦

上完堂時間仲好早
自己一個人去左行街
VCity間芝士撻終於都開左啦
雖然係貴但都決定要買一個返去同Monmon一齊食

媽咪愛心魚湯

而家差唔多每個星期都有魚湯飲
都係媽咪煲既愛心魚湯
通常都係煲定一大碗再分3-4日慢慢飲

愛心早餐

今日老公放假
有得食老公煮的愛心早餐

Monmon的床仔

今日係30wk
Monmon係我個肚到已經第7個半月啦
即係仲有10wk就要生了
時間好快呀
要珍惜同老公二人世界既時間

今日終於都買左Monmon張床仔啦
我地都係買左最初已經好鍾意既0/3 Baby 床
因為間房唔夠位所以我地只可以買訓到3歲既mini床
之前已經決定左要買vina mini 點知噚日話冇貨
吉之島都唔可以訂貨
好彩最後發現Troll Nicole mini個長度同vina mini差唔多
而張床仔仲闊少少Monmon第時仲可以訓得舒服d
Troll Nicole mini比vina mini貴左大約$600
不過Troll Nicole mini係歐洲製造同埋D木都比較好
所以貴左幾百蚊我地都覺得唔緊要
最緊要係Monmon訓得好訓得舒服
我地買左原木色因為覺得天然木色對BB最好
如果白色就怕BB第日會咬luck d油食左落肚仔
我地都買左一張0/3 Baby床褥
上網做過research好多人都話0/3 Baby床褥出名耐用同埋對BB脊椎好
希望Monmon鍾意自己張床仔啦
我地同時買左張Peter Rabbit 床單做替換
吉之島有9折再9折
所有野加埋用左$3200左右
老公又要努力返工賺奶粉錢了

健康院產檢

今朝去左健康院做產檢
有媽咪幫手既關係所以唔使等
整個檢查大約半個鐘已經完成了
健康院姑娘唔建議改預產期
因為其實少於一星期既差距都係唔建議更改
而楊醫生之前幫我改遲左6日
但上星期去照結果又發現Monmon大左一星期
我自己考慮過其實唔改係比較好
因為如果到時要催生咁以8/17黎俾催生日子會比較好
如果以8/23黎計就驚bb留係個肚到太耐啦
所以我自己會當今日係29wk6
時間過得真係好快
已經踏入左懷孕後期啦
今日健康院姑娘都摸到Monmon個頭仔已經向下
仲壓住左我個膀胱所以有時會成日想去toilet
雖然越來越辛苦但只要Monmon健康就可以了
其他辛苦都係值得既

花膠嚮螺燉湯

又來到一星期食一次既花膠嚮螺燉湯
好好味
希望Monmon吸收多d營養啦
多謝媽咪一早起身整燉湯俾我

屬於Monmon的衣櫃

老公今日好努力咁砌左屬於Monmon的小衣櫃啦

最愛的糉

就快到端午節啦
最鍾意就係食糉
冇左女麻女麻包既好彩仲搵到一間味道整得好似女麻女麻既
今日就忍唔住開左隻黎食啦
但買紅豆糉打開變左花生糉
好失望因為我set左個quota今年只可以食3隻紅豆糉架咋
而家得返2隻紅豆糉
點解咁都會俾錯我架
之後媽咪食其他打開睇都係紅豆糉咁都好d
因為我對花生糉興趣不大

28wk1 產前檢查

今日去左私家醫生到做產前檢查
體重比4週前重左2.9kg
而家係57.7kg
磅數終於都有明顯既增加
而Monmon今日既重量係1245kg(2 lb 12oz)
其他既生長都好正常
以今日28wk1黎睇Monmon整體大左1wk1
醫生話係正常範圍所以我諗可以繼續食花膠
而Monmon個頭仔已經調左去下面啦
羊水都係正常
胎盤位置都正常
下次再去私家醫生到做檢查係4wk後
期待下次照超聲波見Monmon

代購初體驗

今日Koki去左西松屋幫我買BB野
我幫Koki做左代購
將d相Fw俾Ven問佢買唔買
我成功咁賣左4樣野幫Koki賺左大約HK$65
原來代購都幾好玩架
當然去買既人會辛苦D啦