Monmon的禮物

今日Monmon又收到好多禮物啦
有d係契媽Ven送
mides 個d係朋友Ray送
Monmon而家d野真係好多
好想快d切好個櫃仔放好Monmon d野

初生嬰兒護理實習班

呢個星期好勤力
一星期上左3個唔同既課程
今日上呢個實習班要3個小時
真係好實用呀
我地學左幫BB開奶沖涼換片著衫同埋抱BB手勢
呢個係同我地一齊學習既BB公仔





















上完堂我地去食一蘭拉麵
我第二次係香港食一蘭
個麵好細根本唔夠飽
不過好好味呀

 



 



屯門醫院產前產後運動講座

今朝同老公一早起左身出去食早餐
然後出發去屯門醫院聽產前產後運動講座
成個講座其實都唔係太有用
不過我地透過個講座報左名6/13去上產前運動實習班
講座完左之後我問左物理治療師點解我右背同肋骨拉扯得咁痛
佢叫我要換過哂D BRA又話唔可以帶返以前個D直到生都唔換
其實我都一早換左啦
已經換左第2次架啦
有時係屋企直情唔用BRA都一樣痛
所以我覺得個物理治療師根本解決唔到我個問題
真係有D灰呀
因為我而家一坐耐少少個肋骨就超痛
少少既意思係大概15分鐘左右
真係痛到想喊
而家只可以用按摩去舒緩個痛楚
希望上完個產前運動實習班可以唔再咁痛啦

包餃子

今次係我第一次自己包餃子
因為老公好鍾意食餃子
所以決定自己去買材料整俾老公食
媽咪教想個餡冇咁實原來係要加少少水
之後會整俾媽咪食
其實當有左BB之後我地都冇再包過餃子啦
因為我平時只食的白菜餃比較寒涼所以媽咪都唔再包俾我食了
但上次出街食過一隻紫菜豬肉餃覺得好好味
所以而家開始可以包返黎食啦
呢個係媽咪同老公鍾意既9菜豬肉餃

分娩減痛及助產呼吸學習班

今日係27wk了
相信到時會自然分娩
所以之前發現有分娩減痛及助產呼吸學習班就即刻報名了
其實到真正生BB時都唔知可唔可以控制到自己呼吸
相信到時又驚又痛都未必記得自己學過點樣呼吸
希望到時候老公係身邊會提醒我啦

今日老公就陪我一齊上堂
上完呢個學習班
好想買一個生產球放係屋企
因為坐左上去覺得好舒服
唔知可唔可以減輕背痛呢
可能第時生左BB要減肥的話呢個生產球都有用既
只係咁大個波放係屋企都好阻位置

韓國綠茶醬

今日下午茶係食多士同飲奶+粟米片
個多士搽左嘉琪係韓國買返黎既綠茶醬
個醬真係超好味但唔知會唔會對Monmon唔好
所以都係唔好食咁多...

學習幫BB沖涼

媽咪係健康院借左個BB公仔返黎俾我地學習點樣幫Monmon沖涼
Monmon出世第一個月因為我仲要坐月
唔係咁方便掂到生水
所以Monmon出世第一個星期媽咪會請假幫手
之後就由老公負責幫Monmon沖涼啦
聽完媽咪教我地我感覺有d困難
老公聽到要小心d唔好整到條臍帶時仲好似好驚咁
希望到時老公盡快變熟手
最緊要唔好整到Monmon

嘉琪返左澳洲後
我地今日做左一次大掃除
辛苦哂媽咪又執屋又吸塵拖地
我就幫手執下野同執左d櫃桶仔出黎放Monmon既野
而家屋企又乾淨又整齊了
遲d仲要執埋間房俾Monmon放BB床
諗起就頭痛了
因為我地冇哂位放自己D野呀

距離Monmon出世既日子越來越短
我越來越緊張了
亦都越來越擔心自然分娩既陣痛
希望每日唱題可以保估我生產順利同Monmon健康

今日買左Avent既奶樽消毒器
好開心可以有95折再95折
而家應該仲有d濕碎野同床仔, high chair未買
生BB真係要用好多錢呀

老公今晚煮左牛扒俾我同媽咪食
仲有一人一隻大啡菇
呢個大啡菇整得真係好好味
多謝老公既心思同汗水

嘉琪返澳洲

終於都到左今日嘉琪要返澳洲既日子啦
好唔拾得呀
媽咪負責送嘉琪去機場
而我係屋企送嘉琪出門口後忍唔住喊了
老公今日又剛返左元朗食飯
打俾老公後老公知道我唔開心
所以好好咁趕返黎陪我
之後我地行左去碼頭個邊散步
心情都慢慢好返了
多謝老公

希望嘉琪下次返香港時我地可以一家人一齊去旅行啦
到時Monmon已經出世啦
期待下次見面

驚嚇的眼前一黑

原本約左同嘉琪一齊去銅鑼灣行街
點知可能去拎車時曬一曬突然間眼前一黑
開始睇唔到野同聽野唔清楚
當時有少少驚因為擔心係唔係Monmon有事
好彩老公拖住同埋過左幾秒後正常返
上左車仍然有D唔舒服個頭有D暈同想嘔
去到荃灣覺得返屋企休息下會比較安全
最後老公要車我返屋企然後再返工
感激老公對我既照顧
返到屋企訓左幾個鐘後已經好返了
我都唔明點解會突然間唔舒服
冇得同嘉琪行街有點可惜
因為嘉琪聽日就要返澳洲啦
下次一齊行街可能要兩年後啦
到時仲可能要帶埋Monmon去街
一切都冇而家咁方便了

德國豬手

因為嘉琪突然間好想食德國豬手
夜晚我地一家人去左洪水橋間德國餐廳到食飯
仲有2日嘉琪就要返澳洲啦
所以安排到既都盡量安排食下嘉琪想食既野
開始唔捨得佢又要離開

今朝嘉琪買左個早餐俾我食
感覺到佢對我好緊張
成日驚我冇野食
又怕我食左D對BB唔好既野
以前覺得兩姊妹感情普通
但可能分開左一段時間
今次覺得原來佢對我好好同好關心
如果佢會返香港既話我諗除左媽咪會好開心之外
我都一樣會好開心

慶祝嘉琪生日

今日提前為嘉琪慶祝生日
夜晚4個人打邊爐當係生日飯
自從嘉琪去左澳洲之後我地已經冇再同佢一齊過生日啦
雖然提早左一個月
但可以一家人切生日蛋糕真係好開心
希望佢以後都開開心心同幸福

大阪BB戰利品

媽咪同嘉琪幫手係大阪買既BB戰利品放到一枱都滿哂
仲有件GAP裙仔, 孕婦用大枕頭同浴衣冇大合照
如果我去到日本的話應該會買更多更多
奶樽大概每個比香港平$20
其他野係香港買都比較貴
不過又點可以搬哂返香港
唯有等吉之島有BB展特價時再入貨
見到咁多BB野真係好開心呀

FAMILY飲早茶

難得嘉琪返香港
媽咪唔使返工
老公返P Shift
我地4個一早起身去左飲早茶
真係好開心呀

懷孕後的背痛

唔知由幾時開始
應該大概4個月個時右上既背脊就開始好痛
我都唔知係唔係肌肉痛
有時要搵老公/媽咪幫我按下先舒服少少
但一停按好快又再痛返
屋企張梳化已經唔可以長時間坐
一坐大約15分鐘個背脊就會開始痛
行街行得耐又會痛
希望痛楚唔會再加劇啦
而家一痛就要訓係到休息
媽咪係大阪幫我買左個U型枕希望可以有幫助啦

日本買只要$210左右
但香港買最平都要$360....
點解香港買孕婦同BB用品都咁貴架

大阪買Monmon用品

媽咪同嘉琪去左日本第4日啦
佢地仲有兩日就返香港
今日佢地去左赤ちゃん本舗幫Monmon買左好多用品呀
好似買左差唔多3萬円
辛苦哂媽咪同嘉琪幫手拎咁多野
佢地係京都仲買左件好靚既浴衣俾Monmon呀
等一歲就可以著啦

Monmon出世前的母親節

媽咪同嘉琪前日開始去左大阪玩
今日係母親節
對我黎講感覺仍然唔太大
只係今年唔係同媽咪一齊過有d唔同
但見到媽咪係日本影既相好開心
即使大家唔係身邊其實都冇所謂了

屋企得返我同老公二人世界
今晚由老公負責煮飯俾我食
老公enjoy煮飯其實係一件好事
能夠同老公一齊去買送我都好enjoy
希望以後我地有更多呢d機會啦
不過第日就要帶埋Monmon出街
始終都唔會想去就去咁方便了

第一次行BB展

今次係有左Monmon後第一次去BB展
山長水遠要去到機場博覽管
好彩坐巴士有位
入場費每人$30
我同老公最後冇買野
不過拎左一D試用裝返黎
都算有點收穫

25wk產檢

今日係照結構後第一次去楊醫生到做檢查
因為21wk照結構時醫生話整體係20wk
所以今日同楊醫生傾左要唔要改EDD
最後決定由8/17改為8/23
即係今日係24wk先正確
如果最後決定自然分娩
唔知Monmon會唔會變左9月出世呢
但9月先出世可能要催生
仲有3個幾月咋
有d擔心同緊張
不過好enjoy同唔捨得大肚既日子
老公每一日都好緊張
出街又扶住我叫我小心
係屋企又會煮野俾我食同幫手做家務
我好開心老公會對我咁好

i-angel 揹帶

嘉琪去左韓國玩
順道見到 i-angel 揹帶
香港一田賣HK$1280
韓國只要HK$700幾
所以我地即刻叫佢幫我地買
我地呢款係4 Seasons Denim, hip seat + carrier
係我地最想要既牛仔布星星圖案
估唔到連釜山都有BB野可以買返香港